Mae'r ystadegau am yr Adroddiadau, a'r rhai sydd ynddynt, yn deyrnged i ddiwydrwydd a thrylwyredd y Fictoriaid mewn byd lle nad oedd hyd yn oed ffuglen wyddonias wedi rhag-weld y prosesydd geiriau.

Er bod y math o wybodaeth yr oedd Gradgrind yn ei geisio wedi troi'n ddihareb am ddiffyg dychymyg, ni ddylem anghofio'r rhesymau pam yr oedd y Fictoriaid yn mynd ar ôl ffeithiau, nac am y tro da a wnaed â'u disgynyddion trwy eu casglu.

Fel yr âi newidiadau cymdeithasol yn eu blaen mor gyflym nes peri anhrefn cymdeithasol gwaeth na dim byd a gafwyd, yr oedd rhaid i'r Fictoriaid wybod beth oedd yn mynd ymlaen.