Contributed by: Darren Wyn Rees
Hir, Hir Hir, hir Y mae un arall yn gohirio o gylch Dy fechan fechan annedd, fel pe bai Yn disgwyl clywed cyffro o'i mewn, neu lais Yn son am adgyfodiad, balmaidd son Am ail gyfarfod. Ust! Nid yw y bedd, Sy'n gofyn ac yn gofyn, nid yw ef Yn ateb un gofyniad. Eto hyfryd yw Adgofidio'r hyn a fu, na ddaw drachefn, Na ddichon eto ddyfod. Pan ymhell Ar gefnfor bywyd, hyfryd tremio `n ol Ar lawer ynys deg, y buwyd gynt Yn canu ar ei glannau fel pe buasai Ein troed ar dir paradwys. Gwrando, ddyn! Nid byd i ganu ydyw hwn, nid bywyd I fod mor ddedwydd nes anrheithio'r nef O'i dymunoldeb a'i hawddgarwch. Pwy Ddymunai Nef, a gado ei anwylion, Ac yntau'n ddedwydd yma? Cartre i'r blin, A noddfa rhag ystormydd yw y nef; A dyna hanner ei nefoldeb hi, Ei bod yn ddiwedd ar ofidiau bywyd. O hapus awr a'n ca Ymhell ym mroydd gwynfyd, yn rhy bell I farw mwy, tra glannau duon amser Yn gwywo o'n gwydd, a'r dymhestl olaf, olaf Yn marw ar draeth y bedd. - William Thomas (Islwyn)